小雪最近再被邀請做「FreshUp粉嫩透紅霜」嘅代言人，為咗配合宣傳，佢呢排嘅裝扮都以粉紅色為主，實行做個「紅粉佳人」。
小雪最近重得到SayaCoLimited頒咗一個名為「最誘惑紅唇」嘅獎項畀佢。
平時小雪為保持最佳狀態示人，佢都會搽啲唇膏先見人，但因為長時間搽唇膏，會令唇色變深，所以小雪就試用咗佢推介嘅產品，佢話用咗之後，情況有改善喎。
而小雪呢次續約做廣告嘅代言人，佢話：「酬勞超過六位數字，我都好滿意，而且拍攝又認真，我都好開心。」
小雪早前做宣傳時，她被指不時攝位博搶鏡，成為新一代「攝石人」，但廣告商噚日在電話訪問時話唔介意小雪嘅負面新聞，一切都冇影響。
陳慧珊噚日返無綫電視城拍攝月曆海報，問佢有冇致電慰問好友蘇永康時，佢話：「呢啲嘢我哋心照㗎！總之點樣我都會支持佢，其他嘢我唔會講。」問佢平時有甚麼方法減壓，佢講笑咁話：「打蔡少芬同張家輝嚟發洩吓囉！其實我通常都會打電話同朋友傾，自己入行都五年，識得點去調節，一切順其自然。」
陳曉東前幾日接受新城節目《是夜不是夜》訪問。東東講到自己嘅愛情觀，佢話經歷咗咁多事都唔會影響到佢，對愛情重好期待，如果感情有變亦唔係任何人嘅錯。東東重話自己嘅性格好自我，所以有時處理事情上，好容易畀人誤會，結果問題就愈嚟愈多。
任賢齊（小齊）噚日下晝兩點幾，喺經理人陪同下由上海到港，佢話今次係專程為電影配音。
對於康仔喺台灣涉嫌持有同服食搖頭丸一事，小齊話略有所聞，佢話：「我識佢，但我唔清楚件事，真係唔想評論呀！」問小齊有冇去過事發嘅TeXound酒吧消遣，佢就話：「我唔知間嘢喺邊喎。」
徐克幫中國星拍嗰套《蜀山正傳》賣咗畀Miramax之後，原本準備安排喺美國上映，但美國嗰邊用咗好幾個月時間重新剪接同做效果，仍然擔心呢類片種唔知啱唔啱美國觀眾口味，所以最後都係決定先推出影帶，睇吓市場反應係點先算，而徐克呢輪重搞緊一部內地開拍嘅少林功夫片。
今年香港嘅唱片市道由一月至三月，總唱片銷量跌咗百分之十五，唱片公司都叫晒救命。𠵱家所謂好賣嘅歌手都係賣幾萬張唱片，Twins、楊千嬅叫做賣得唔錯。楊千嬅起得快，其實都要多謝鄭秀文，因為Sammi拍戲叫價成五百萬咁高，但外地又冇市場，片商計唔掂數，惟有轉搵千嬅，終於畀千嬅彈起。
容祖兒幫「LaMilkyWay銀河明星」構思設計嘅首飾，大家都以為佢嗰個系列嘅公仔嘜頭係貓仔，但馮仁昭八到嗰隻公仔原來係熊仔，其實睇落隻公仔點都係似熊仔多過貓仔，都唔明點解會搞錯，可能容祖兒本身好鍾意貓，所以先至會畀人有咁嘅誤會囉。
潘秀瓊、崔萍、鄭錦昌等噚日喺灣仔出席《星星相惜金曲無限慈善演唱會》嘅宣傳活動，潘秀瓊喺台上回顧當年同好友崔萍合作時嘅趣事，十分開心，潘秀瓊回憶起曾經腦部生瘤嘅日子，佢話會更加珍惜生命，佢話：「做人最緊要活得開心，𠵱家健康狀況好好，有時間重會做義工。」