利嘉閣計劃將總部遷往灣仔中怡商業大廈，聽講佢哋租4、13同14樓，其中4樓重有前後露台，利記已諗好將後面露台用嚟做員工康樂場地。
新總部嘅租金比現時銅鑼灣總行平一半，唔怪得大業主肯減租，佢哋都唔續約啦。
近期樓市又靜番啲，恒基就推出新招促銷北角港輝豪庭同御皇臺貨尾，由噚日開始至7月1日，做到最多數嘅代理行，就可以獲得恒基一個樓盤嘅獨家代理權，但係邊個盤就由恒基決定。而兩盤嘅代理佣金係1.5%，
中原自從攞到九龍城獅子石道1號嘅獨家代理權之後，呢排好旺「獨家」，噚日啱啱獲委任為油麻地俊逸豪園嘅獨家代理，恒基嘅荃灣芙蓉雅苑今日又同中原簽約，畀佢做獨家租售代理。
新鴻基地產近排好興用電視特約方式宣傳樓盤，好似早前就用新時代廣場特約來贊助一遊戲節目「一觸即發」，最近準備推介馬灣珀麗灣，為咗加深公眾對馬灣嘅認識，新地今個禮拜五同下個禮拜五，晚上11時35分就會喺無綫播放為時5分鐘嘅特輯，名為「四通八達新馬灣」，到時將介紹由青衣到馬灣沿途景色，交通網絡，如何將屋苑規劃與大自然生態融合於一體。
蘭西