昨日講羅康瑞要求高層下屬每年評估佢嘅表現，夠晒虛懷啩。華人老細嘅最大缺點就係效法老毛做一言堂。大權獨攬不聽勸諫，一人說了算，下屬全部唔敢出聲，出親聲就報喜不報憂，博老細歡心。
羅康瑞咁嘅透明開明作風，好少見啫，尤其是佢嘅尊翁係傳統人物，對啲仔女管得好嚴，冇人敢逆佢意。喺咁嘅環境長大，一啲人會變得更獨裁；一啲人會立志改變老人家嘅做法，羅康瑞大概係後者。
瑞安集團喺八十年代中期猛咁擴充，到內地搞酒店、收購快圖美、做建築、基建、地產，美其名曰分散投資，但結果唔係咁成功，投資冇乜利益，後來改變方針，接受現實，變賣資產，只做番核心業務，就係物業、建築、建材，唔再分心。結果好掂噃，上海新天地更加打出名堂，無人不識㖭。
究竟呢個轉變嘅決定，由何人拍板呢？瑞安嘅老友記話係由羅康瑞親自拍板嘅，因為如果老細自己冇虛懷，自動檢討投資錯誤，夥計邊度敢批評老細過往嘅擴充業務決定呀！
老友記講得幾啱，下屬要指出老細錯誤，風險好大，即使有一套制度保障，亦要揣摩上頭意旨好耐至得。中國歷史上，只有一個李世民（唐太宗），亦都只有一個魏徵，毛澤東之流就多得很，此乃中國人之悲哀也。