朱茵早前遠赴泰國拍攝新歌《一分一吋》的MV，她在MV中穿了多套性感的三點式泳裝，除躺在岸邊擺出誘人的甫士外，更在水中跳健康舞，甚有睇頭。
朱茵前晚在上環喜駿日本餐廳接受RoadShow訪問，並宣布明日將會播出新歌《一分一吋》的最新MV。今次MV是朱茵早前遠赴泰國替張玉珊的修身堂拍廣告時一同取景拍攝，當中朱茵着了三、四套三點式泳衣，除了在岸邊擺出各種不同的性感撩人甫士外，更在水中跳舞。
朱茵自資的個人唱片打算在八月推出，但至今仍未找到唱片公司發行，問她可會考慮男友黃貫中所屬的環球唱片公司時，朱茵回應說：「我唔想講。」朱茵表示新唱片不會有固定的形象，最重要自然。
最近娛樂圈藝人頻頻傳出負面新聞，日前蘇永康涉嫌在台北的夜店被警方搜出搖頭丸，同行的安雅亦被扣查，問朱茵可擔心以後簽唱片合約，公司會加條款不准吸食毒品時，她說：「呢啲條款可以保障雙方，係公平嘅。唔止公司可以加畀藝人，藝人亦可以加畀公司，例如公司唔可以破壞藝人形象。佢要求我唔可以食丸仔，我要求公司唔可以走私販毒就真！」
朱茵認為自己「行得正企得正」，不怕被記者跟蹤，她說：「以前啲記者跟蹤我，都知我唔係開工就係返屋企㗎啦，我好少去的士高，就算想去阿Paul（黃貫中）都唔畀我去啦！」對於安雅被牽涉在案，朱茵替她不值，她說：「安雅好慘，呢件事都未知係咪事實，就俾啲報紙登晒出嚟。」
採訪：李珮洳
攝影：陳偉權