如果有三、四十萬資本，又喜歡食的朋友，可以效法前童星鄭柏林的媽咪鄭太，在布吉開一間海鮮餐廳，既可滿足口腹之慾，又可以作為朋友聚腳地，可謂一舉兩得。況且鄭太相信2006年，布吉將會替代深圳，因有來往香港及各地的火車總站，到時人流會比現在更旺。想在內地創業的朋友，布吉這個具潛力的地方，可會在你考慮之列呢？
記者：羅蘭
攝影：KennyWong
鄭太可說是兒子鄭柏林的經理人，因為他所拍的每一部戲，都是由鄭太接洽，但自從柏林專心學業後，鄭太卻成為藝人經理人，專門為他們洽談大陸登台事宜。不過她百足咁多爪，上月底她還跟舊同學在布吉新樂路開了一間食肆，名叫「柏林海鮮餐廳」。
「其實原本我係想開魚蛋串燒檔，因為我和一班藝人見到東門嘅串燒檔口，每日都有好多人幫襯，所以就想開番一間，順便可以有一個聚腳地。點知我哋發覺喺東門租一個約400呎嘅舖位，都要五、六萬蚊，簡直貴到嚇親，於是講講吓就無咗件事。
「後來我有一個福建嚟嘅舊同學，佢又話想喺深圳開一間廣告設計公司，但唔知點解大家傾吓傾吓，我哋竟然會一齊開咗間海鮮餐廳。」鄭太自己都莫名其妙地笑起來。
環顧整間餐廳，面積1000多呎，布置簡單整潔，以白色為主，牆上只掛了幾幅照片，全是香港藝人。
「我覺得餐廳最重要係乾淨，所以我唔會特別布置得美輪美奐，簡單舒服就已經好好。你知啦，我呢度經常都會有藝人出入，佢哋食嘢好嘴刁㗎嘛，做海鮮就最好喇。本來我間餐廳叫『明星館』，但因為內地話明星呢個名唔可以亂用，於是我咪改『柏林』，因為呢兩個字好夾我同拍檔嘅時辰八字。點知佢哋又話柏林係德國地方名，後來我解釋話我個仔都係叫柏林，佢哋先肯批咋。」
鄭太初次在大陸創業，很多事都不知怎辦，幸好拍檔俞先生是內地人，於是申請牌照、租舖及訂貨等大都靠他。
「選在布吉開業係因為佢租金比東門平好多，而且俞生話到06年，布吉的火車站起好後，人流就會多好多。初時我以為資金唔使太多，二、三十萬乜都搞掂，但點知淨係買杯碟我都用咗萬五蚊；以為魚缸幾千蚊都可以做到，點知又花咗萬五蚊。重有我唔知道原來豬肉都要入幾十斤，啲海鮮就真係海鮮價咁貴，所以如果想做生意，我提醒香港嘅朋友錢銀最好預鬆少少。」
話鄭太心口寫個勇字就去做生意，一啲都無誇張，因為原來到開張那天，鄭太和俞生都從未嘗過大廚的手勢。
「係呀，我哋真係唔知驚㗎，因為我哋兩個都係門外漢，完全靠信人。我其實根本唔識個大廚，亦未曾食過佢煮嘅餸菜，全靠我一個內地朋友幫我物色，佢喺飲食行業係老手，我只係信佢咋。連個大廚都問我使唔使試吓佢做嘅菜，但我就話到開張嗰日，我自然會叫啲藝人嚟試，因為佢哋食慣好嘢，比我會更在行。
「到開張嗰日，好多藝人都上嚟試食，我就畀紙筆佢哋，要佢哋食完每一碟菜之後，寫份試味報告，然後我就畀大廚跟住改良。就連啲藝人都話我係冒險家，敢搵一班連自己都唔知好唔好嘅大廚番嚟開業。」
對於自己班員工，鄭太表現得極為滿意。
「佢哋個個都幾聽教，但就要好似湊女咁湊，因為始終大家文化不同，香港人話頭醒尾，但佢哋就要慢慢教。好似我會要求班女仔返工化妝，無論個客食幾多錢嘢，都要對佢哋保持笑容。有時我自己會喺香港買啲化妝品或香水畀佢哋，𠱁佢哋開心，所以我同佢哋都能打成一片，連附近食肆嘅員工，都好羨慕我哋上下相處得咁開心。
「其實上到嚟做生意，我哋應該入鄉隨俗，我哋同隔籬嘅西餐廳好熟，例如佢哋唔夠調味料或者外賣膠盒，都會過嚟同我哋借，無所謂啦，大家互相關照。」
不過有一樣是連鄭太都估不到的，就是這間餐廳原本以海鮮作主打，但現在卻演變成以小炒為主。
「原來呢度嘅人唔會食太貴價嘅海鮮，佢哋反而鍾意價錢平嘅小炒，所以我哋惟有改變方向，以十八蚊斤基圍蝦同一蚊一隻扇貝做宣傳，吸引客人入嚟幫襯。另外，我哋又會推出五蚊一個快餐連例湯，又大力推廣大廚嘅招牌菜式蒜香骨。所以開張十幾日，我哋已經有一班日日上嚟開飯嘅熟客仔，佢哋主要係附近商舖嘅職員，重話鍾意我哋間餐廳有酒店式嘅服務、大牌檔嘅價錢咁話，令我不知幾高興。」
投資日期：2002年5月
租金（2個月按金1個月上期） ?60,000
裝修（連廚房爐具、枱櫈、電器） ?200,000
入貨 ?50,000
人工（共18名員工） ?23,000
員工宿舍（按金、上期連家具） ?20,000
流動資金 ?30,000
雜費（管理費） ?500
總投資額 ?383,500
預計首月營業額：?100,000
預計首月盈利：?50,000
根據鄭太拍檔俞生表示，在布吉開餐廳開業前須申請：
1﹒衞生許可證
2﹒消防證
3﹒環保證
4﹒稅務登記證
5﹒以上批文齊備後才可申
6﹒請工商營業執照
查詢網址：
1.資金要鬆動：不可計算得太盡，因為會有很多預計以外的開支。
2.抱開放態度：對員工要有耐性及包容性，凡事都要放開懷抱。
3.內地人幫忙：最好有熟人在內地幫忙，方便跟當地有關部門溝通。
4.要學識執生：如果見勢色不對，需立即轉營業方向，免鑽牛角尖。
5.找個好廚師：大廚是餐廳的靈魂，所以一定要找到個好的，還要親嘗對方的手勢。
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。