重記唔記得麥嘜故事入面，麥兜最希望去馬爾代夫度假，結果麥太在他的疲勞轟炸下，惟有帶他到離島，來一招瞞天過海。若然你亦夢寐以求可以去夏威夷享受陽光與海灘，但又礙於銀根短絀，不妨到小西灣走一趟，皆因那裏亦有一個小夏威夷──CafeHawaii，餐廳有露天茶座，再加椰林樹影，亦有多款由大廚自創的夏威夷菜，將各地烹調方法混合，是當地的傳統特色，綜合以上客觀因素，再加一點幻想，置身夏威夷，搭車去都得啦！
記者：黃婉冰 攝影：林栢鈞
ImageGirl：Vicky
夏日新菜單
法國翡翠大海螺$35/3隻
＊歐胡島荷葉海鮮菠蘿炒飯$78
椰林日出$26
澳洲大蘑菇伴炒雜菌$35
茂綺島炭燒龍蝦牛柳$148
＊唯美灣銀鱈魚扒$78
焗薄脆鮮果巴地伴自選雪糕$35
黑加崙子雪糕冰沙$26
＊推介菜式
加大碼的咖喱角實是蘋果批的變種，外層是中東的千層酥皮，包住新鮮青蘋果粒、提子、肉桂同牛油，千層酥紙咁薄，包時反覆摺成三角形，就可做成千層的效果焗上十分鐘，撒上糖霜，伴以自選味道雪糕球，趁熱食之餘亦記得趁凍食，兩者混合造出冷熱強烈效果。
試味報告：千層酥皮薄，青蘋果餡靚，外層鬆脆可口，內裏酸味味蘋果肉夾雜着強勁肉桂味，有少少似食蘋果批，一半巴地一半雪糕一齊食，效果最好。
夏威夷最出名燒烤，可以將多餘油分燒走，用來對付多脂肪的銀鱈魚扒最有效，先用新鮮檸檬汁、黑椒等醃過將腥味踢走，伴以各款烤雜菜如茄子、青瓜，淋上鴛鴦汁（菠菜芝士忌廉汁同鮮茄醬）。忌廉汁用新鮮菠菜茸同新鮮忌廉煮成，後補Mozzarella芝士再輕輕焗溶，兩汁相遇，味道鬥得難分難解。
試味報告：銀鱈魚香滑鮮美，魚肉烤得剛好，有着陣陣燒烤香，比烤前來得更香口，毫無油膩感；菠菜汁有淡淡菠菜的清香味，令忌廉汁增添一重味道，茄汁香，夠開胃。
來自南非的大螺，有着碧綠的外殼，絕對可以給它冠上海中翡翠這個名字。大螺有半隻手掌般大，3-7月是當造期。白灼過後雪凍，配上兩種大廚自製的汁──油醋汁及辣汁。油醋汁用紅酒醋加橄欖油調成，而辣汁有鮮茄茸、白蘭地、檸檬汁、檸檬皮、少量黑椒和辣椒混合，是大廚特製用來伴田螺。
試味報告：比起普通花螺，這種翡翠螺雖然還要大，但咬落卻出奇地鮮甜爽口，螺肉較軟腍，唔會咬崩牙。蘸油醋汁，鮮甜中帶酸香；蘸辣汁，辣味輕微清香，兩種汁味都點到即止，為單調的螺味加上點綴。
大廚Samson：「夏威夷菜式帶有輕微亞洲風味，同時亦有着其他國家的特色，多以生果入餚，當地人好鍾意用鮮花伴碟，材料大部份以海鮮為主，燒烤係常用嘅烹調方法，咁樣會較健康同可以保持原味。」
靈感是大廚取自中式荷葉飯，所以做出這款有荷葉飯外表，意大利內餡的特色炒飯。飯底是中式最傳統的蛋炒飯，蟹、青口、帶子、沙白(蜆的一種)、蝦、魷魚輕輕一灼，再用橄欖油、鮮茄茸、香草燴熟，連同炒飯包在荷葉內便成。
試味報告：炒飯炒得夠乾爽，入口無黏的感覺，粒粒分開，海鮮味與茄醬的香料配搭得宜，沙白味道與蜆一樣鮮甜，略大隻且腍，材料比傳統荷葉飯豐富。
新鮮的澳洲大蘑菇，只需加入調味料稍醃，放在爐上扒便成，面頭鋪上已切碎兼用橄欖油和酒炒過的日本金菇、冬菇、西椒、黑水欖，最適合用來做頭盤。圍滿的紅、白汁分別是紅方混有紫蘇、洋葱、香葉及白酒的鮮茄汁，白方的就是鮮忌廉汁。
試味報告：雜菌有好香牛油味，大菇新鮮，重菇味，菇身厚但入口軟腍，帶有少少煙韌的口感，若然要原汁原味，不蘸汁食亦可。
店名：CafeHawaii
電話：22485933
地址：小西灣小西灣道28號藍灣半島商場G7舖
座位：65個
營業時間：星期一至五中午12時至下午3時，下午5時至晚上11時，星期六、日及公眾假期中午12時至晚上11時。
付款方法：現金及信用卡（Visa及A.E.）