遙控玩具愈出愈有噱頭，繼早前嘅遙控渣古機械人附有鏡頭後，最近連遙控車都裝上小型鏡頭，而且質素及效果都比渣古優勝，玩具界預料勢必大熱！呢架遙控車最引人入勝之處，係玩家可以憑住遙控器上螢幕的影像，將車遙控至想到的地點，睇住遙控器駕駛，感覺就好似打緊機一樣，非常好玩；大家重可以利用呢架車玩追蹤㖭！
記者：張穎倫
攝影：伍慶泉
ImageGirl：May
呢架車表面上同普通嘅1:16遙控車一樣，車款更係最大路嘅Rally版標緻206，睇落唔覺有乜特別。不過呢架車嘅車頭裝有小型鏡頭，能將車前影像傳送到遙控器螢幕上，而且接收範圍更可達70呎，比之前同樣有鏡頭嘅遙控渣古嘅5呎範圍遠一大截。再加上車頭大燈亦可開着，能增加光線令影像更清晰。遙控器除咗一般前後左右同快慢速選擇外，更有螢幕光暗掣，讓你可因應室內室外不同環境隨意調校，清晰程度絕對係遙控玩具中數一數二。
電源：
6粒AA電（車身）
6粒AA電（遙控）
售價：$2,480（三越）
率先試玩：唔怕障礙物
只要換上鹼性或者充電池，車速、接收以至螢幕光度都會大大提升，就算遇到障礙物以至大量光管都唔會影響接收。喺螢幕協助下，可以足不出戶，就將遙控車駛出室外，再加埋第一身視點，絕對係集遙控車、打機嘅優點於一身，完全打破以往遙控車嘅玩法。
隸屬於NIKKO嘅SUB-168遙控潛水艇，之前水貨訪港由於貨源唔多，令價位上漲近$700。𠵱家行貨正式入港，唔單止貨源充足，而且更以潛水價$465開賣，極之抵玩。咪睇小呢架潛艇仔只得170mm長，佢一樣採用雙摩打設計，更可潛達2呎水深，之後亦可輕易浮上，絕對有姿勢有實際。
試玩報告
起初都驚會入水沉沒，但試玩後發現佢可以正常潛航，轉向完全冇問題，美中不足係行得比較慢，不適宜於大海航行。
電源：
3粒AA電（潛艇）
1粒9V電（遙控）
售價：$465（三越）
DigiQ嘅迷你遙控車可以話冧盡大人同細路，今次夥拍Game界大廠KONAMI推出DigiQ火車系列。一套有齊JR500子彈火車、路軌同遙控器。雖然車仔細細，但係都做得非常精巧，特別係遙控器，設計同真嘅日本火車一樣，有齊加速、煞掣，以及5速選擇，絕對係立體版《電車Go》！
另配火車
除咗套裝入面嘅JR500之外，玩家更可以選擇另外3款火車，令你可以布置自己嘅火車網絡，8月更會推出香港人最熟悉嘅「山手線」車廂，等你過足東京癮。
電源：4粒C電
售價：$568（精思）
一般迷你遙控車，雖然車仔細細，但遙控器Size比較巨型，帶出街唔算好方便，所以呢部遙控車就採用掛腰設計。遙控器同車可以好似手提電話一樣夾住喺腰，等你輕鬆行街之餘，又能隨時玩車，夠晒方便。呢架1:36嘅遙控車亦係採用充電設計，利用遙控器充電，減輕車身重量，拎得非常舒服。
電源：4粒AA電
售價：$249（三越）
近年流行玩遙控機械人，但大家寄予厚望嘅遙控渣古就行得唔穩兼接收差，令人大失所望。所以今次遙控玩具大廠京商推出嘅1:35GUNWALKER機械人，就配咗塊300mm×400mm嘅鋼板，利用機械人腳底裝上嘅磁石，行勻前後左右都包保穩陣又順暢。而且隨機更附送駕駛員及多種武器，戰鬥力十足。
電源：
4粒AAA電（機械人）
1粒9V電（遙控）
售價：$1,680（JCSHOP）
售賣點
三越百貨（25765222）
銅鑼灣軒尼詩道500號
JCSHOP（31022783）
銅鑼灣時代廣場8樓833號舖
精思（31015033）
尖沙嘴廣東道5號海洋中心商場347號舖