收費台一班講波佬唔知係咪玩得興奮過龍，搞到有時講嘢唔係好客觀，令到部份球迷有微言。
前晚有位女觀眾打電話去公仔箱嘅世界盃節目度，話收費台啲講波佬講波講得好唔掂，唔夠客觀，一面倒咁幫晒某一支球隊。
講真呀，我求大俠都頗同意呢位女觀眾嘅意見。事關好似喺阿根廷輸咗畀英格蘭之後，收費台某位講波佬竟然話英格蘭同阿根廷喺下場一齊贏波，咁就可以將瑞典踢出局。雖然喺香港捧瑞典嘅球迷唔多，但有好多人捧龍格保呢位好波之人，嗰位仁兄咁講，真係令人覺得好反感同好無癮。
站在觀眾嘅立場，我求大俠都覺得收費台個世界盃節目搞得有聲有色，又夠熱鬧；但係，佢哋就似乎畀唔到好多即場中肯分析畀球迷。
查實公仔箱嘅「阿叔」講得真係冇錯，講波最緊要客觀，好就讚、唔好就鬧，唔應該加入私人感情落去。如果收費台可以改善呢一點，加埋之前我講希望落番多啲賽後兩隊離場鏡頭，令到更多觀眾睇得高興，咁就賺得更多嘞！
巴西雖然入咗十六強，但淘汰賽都重未展開，佢哋嘅卡洛斯同祖連奴就話約定英格蘭喺四強見。雖則話以巴西嘅實力，入四強應該冇乜問題，但所謂世事冇絕對，法國同葡萄牙都輸畀啲弱隊喇。若然巴西入唔到四強，睇怕卡洛斯同祖連奴到時咪要搵窿捐。
法國喺今日晏晝對丹麥，可以話係生死戰，火藥味自然濃，但估唔到兩隊連天氣都可拗一餐。丹麥話法國之前兩場比賽都打夜波，唔知南韓晏晝天氣幾難頂，一定適應唔到，但法國又話丹麥之前兩場都打晏晝波，球員熱都熱死，呢場重邊有力踢吖！
前阿根廷球王馬拉當拿雖然獲日本批出簽證，但由於手續及成行安排需時，令到馬拉當拿最快都要喺禮拜三阿根廷對瑞典之後至可以去到日本。係人都知如果阿根廷喺禮拜三贏唔到就要出局。如果真係咁唔好彩嘅話，馬拉當拿去日本唔通購物？
南韓李乙容喺噚日對美國場波，成為今屆首個射唔入十二碼嘅球員（之前十個都入）。其實佢嗰球都算射得幾靚，但咁啱就俾費度捉到路。費度喺英超聯效力弱隊布力般，冇乜邊仗唔使左撲右撲，所以咪練得一身好武功囉。李乙容遇到佢，算佢自己唔好彩啦。