大家唔好怪小初冇新意，因為今日又係講一隻以前提過好多次嘅股仔駿雷國際（070），隻股近期成交又多番，原因係公司上個月公布發行可換股票據嘅交易，將喺呢一個星期完成，斷估都係時候做靚股價。
駿雷上個月中，公布向一位獨立第三者，發行一批金額1500萬元嘅可換股票據，換股價係15仙。通告發出後，駿雷股價一度輾轉回落，但近排又好番好多，好似噚日咁，最高見過14.7仙，收14.2仙，升2.2%，成交金額有831萬元。
經紀陳話，呢批票據嘅條款講到明，隨時可以換股沽得。有人無端端要你一手票據，雖然唔排除可能係睇好公司前景揸長線，但有錢賺時沽貨亦係正常事，所以15仙換股價其實好有啟示性，一旦大幅拋離，隨時有沽壓。
該批票據一經換股，會佔駿雷已擴大股本5.2%咁多，如果想要散貨，相信有心人都要畀多啲心機先至掂。
慕容小初