新地自從透露馬灣珀麗灣會響7月開盤，各行都積極部署前期代理工作。鴻運地產為咗令員工對呢個盤有更深入認識，所以租咗香港小輪嘅港外線輪船，今日舉行馬灣環島遊，由田老闆帶領200幾人，透過實地觀察，了解馬灣環境同地勢，令同事更掌握個盤嘅坐向同景觀等賣點，日後推介時都唔使矇查查。
該公司到時重會派資料畀同事。聽講重有叫同事帶埋望遠鏡去睇盤，果然設想周到。
和黃集團位於東莞嘅豪宅項目海逸豪庭二期倚湖名居，現樓示範單位、會所同高爾夫球會都已經落成，今個禮拜五招待新聞界參觀，睇嚟個盤好快就會賣。發展商當日重會為記者安排一個攝影比賽，送出豐富禮物。
利嘉閣上水分行噚日開幕，該公司除首度將分行門面重新設計，迎合年輕化嘅買家外，重出咗一本季刊，介紹公司內部活動，講吓公司以小勝大，在新盤中攞獎嘅原因，並以可愛嘅新生命做封面。
蘭西