美股上周五表現疲弱，港股跟隨低開，但跌幅有限，各類股份個別發展，恒指最後倒升4點，收報11288；交投薄弱，只有57億元，真係「悶出鳥來」。有報道指外滙投資公司將於本周四公布新一批盈富基金（2800）發售詳情，普遍估計呢期最多都係推出60億元，只係投資者多選擇靜觀其變，謀定後動，所以呢兩日更難有突破。
大市表現沉悶，銀行股較弱，滙豐控股（005）跌1元，恒生（011）亦跌0.25元，相信主要係美林證券發表報告唱淡香港銀行股，預期滙豐香港業務貸款增長會進一步減弱，加上破產申請急升導致撥備增加，促使美林調低滙豐今年及明年嘅每股盈利，減幅分別為2%至3%。不過，阿虎覺得滙豐喺93元水平有頗大支持力，相信大跌機會唔大。
不過，美林亦有睇好嘅銀行股，佢唯一睇好係中信嘉銀（183），覺得此股現價相對便宜，加上具中國發展的概念，值得吸納；同樣看好嘉銀重有道亨證券，話佢值2.85元。嘉銀噚日升3%，收報2.525元，仍有一定上升空間。
e莎莉話，市傳北京中信擬將旗下國內寬頻及電訊業務在港借殼上市，對象係兆晉國際（491）。兆晉前稱偉栢集團，主要生產電子產品，去年則引入新股東，發展資訊科技。阿虎側聞中信唔係搵佢做旗艦，只不過係一個合作對象，但有人要炒作，當然講到好偉大，大家都係小心為上。噚日兆晉股價先升後倒跌，最低見0.192元，收報0.20元，跌1.4%，成交2290萬元，股價似乎反映咗一切。
阿 虎