潮流興食得清淡，無論為keepfit，還是為信仰，又或者為健康，香港人愈來愈多人戒食肉，特別係女士，所以素菜館大有可為；只要做得好，司長局長都幫襯。
高官之中，篤信佛教嘅梁愛詩未做律政司司長之前，好鍾意請記者去銅鑼灣「功德林」試菜，八方都做過詩姐座上客。不過功德林中人同八方傾開話，「詩姐」做咗司長後，可能太忙，冇時間親身來幫襯；又或者怕太張揚，多數叫外賣；一係就到會，請師傅去佢屋企煮齋，招呼一眾親朋戚友。
詩姐少咗光顧，另一個阿姐就係常客，大家就可能估都估唔到，佢就係形格硬淨之保安局局長葉劉淑儀。葉劉決心減肥，不過，有學者轟佢嘅減肥餐單營養失衡，長期食會使人好似「老虎狗」咁躁，重有可能躁到「斬人」！睇落個學者過份擔心，葉劉好鍾意食吓齋降吓火，重帶埋個女一齊食，所以佢架車被人圍時，佢都照睇雜誌，第日亦冇鬧人！
傳真︰2623-9278
電郵︰