女球迷一日多過一日，有啲重唔係齋係睇靚仔，而係真真正正有研究、有角度、識欣賞嘅貨真價實球迷。
話說回來，球迷市場得以衝破性別界限，真係要多謝碧咸，連我老媽子都識碧咸，實在比湯告魯斯更有家庭客。碧咸固然靚仔，但唔算得上好好靚仔，殺食嘅係嗰個「做嘢樣」。出色嘅運動員落場時都有一個「做嘢樣」，男人嘅「做嘢樣」最能討異性歡心，如果能夠「做嘢樣」與「靚樣」共冶一爐，咁就不難成為女性湯丸。
動物世界中，體能好的雄性都較獲雌性所垂青。普遍的都市男人撐三層樓梯經已氣鑼氣喘、面青口唇白，球員們在草地上奔跑足九十分鐘而面不改容，如斯體能的表現，女孩子們的幻想油然而生。
足球員強壯但身形一般不會太離譜，不像十呎高的籃球員，鹹煎餅般的舉重運動員與加隻角就似犀牛多過似人嘅美式足球員。愛美是人的天性，喜歡欣賞美麗的胴體，男女皆同此心。看見贊尼有如雕像一樣的身體，我也有點心郁郁。
如果沒有了「做嘢樣」，碧咸最多只能在肥皂劇裏撈一個小配角，巴迪斯圖達着件夏老威襯條短褲膽拖長白襪涼鞋，一樣似足一個小巴司機，重分分鐘被差人查身份證。
我沒有靚樣、好身材與高效體能，但在我的專業範圍內我也有一個「做嘢樣」，美少女們，有興趣看看嗎？