阿雲靠丈夫從事司機養活一家四口，惟近年丈夫患上心臟病且長期失業，以致舉家生活陷困，無力支付屋租。她帶着兩名分別三歲及七歲兒子，現每日三餐僅以粉麵或腐乳送白飯，境況堪憐。
記者到訪時，阿雲正準備與兩兒吃午膳，枱上餸菜只得數磚腐乳。三十六歲的阿雲苦着臉說﹕「兩個仔咳得好犀利，我今朝帶咗佢哋去公立醫院排隊睇街症，但我用咗成七十蚊畀醫藥費後，𠵱家手頭上剩得十幾蚊，重邊可以攞晒啲錢去買餸！」
阿雲的丈夫陳先生，多年來任職巴士司機，是家中經濟支柱。奈何早前陳先生因健康欠佳一度無法繼續駕駛巴士，經休養後健康稍為好轉，卻面對市道欠佳再難覓得工作，令一家經濟拮据。
「阿陳因為有心臟病同胃痛，捱唔到長時間揸巴士，點知佢做完心臟手術、精神好啲之後，試過搵過唔少工，好似搵看更、地盤、酒樓咁，都一直冇回音。」
容顏憔悴的阿雲續歎謂﹕「呢幾個月除咗阿陳幫人做替工揸的士、賺過少少錢之外，成頭家嘅開支全靠朋友借錢應付，但借得多，𠵱家個個朋友都怕咗我哋，令我哋借無可借，真係到咗山窮水盡嘅地步！」
阿雲一家現面臨三餐不繼，無錢繳付屋租，另家中基本電器損壞亦無力換購。「早兩日部洗衣機洗洗吓衫突然出煙，嚇到我即刻熄電掣，怕部洗衣機會爆炸；嗰把用咗十幾年嘅風扇，尋日就無端端壞咗，令間屋更加翳焗。𠵱家我哋連今個月嘅屋租都唔知點應付，就嚟都無錢開飯，重邊有能力買過把風扇同洗衣機。」
陳家四口居於地方狹窄的舊型公屋單位，月租七百三十元。由於經濟緊絀，阿雲近日已向社會福利署提交綜援申請，但尚待審批，難以解決眼前生活急需。
蘋果日報慈善基金了解陳家苦況後，即時撥款五千元給阿雲一家支付已到期的屋租，應付短暫生活及膳食費用；另安排轉送由讀者捐贈的全新風扇及洗衣機給阿雲，解其困境。捐款編號﹕C0580
暖流熱線
電話:29908688
傳真:23702192
電郵:
網址：