蔡少芬（Ada）、吳啟華、黎姿同鍾麗淇等，噚日喺電視城為無綫劇集《黑夜彩虹》進行開鏡拜神儀式，Ada同黎姿咁啱都係以性感裝束亮相，Ada就更加係以lowcut現身。
Ada同吳啟華被譽為螢幕情侶，日前有周刊報道話佢哋關係曖昧，吳啟華經常等埋Ada收工，重管接管送，噚日Ada對此呼冤話：「近日都有狗仔隊跟蹤，我都未坐過啟華架車，佢亦冇等過我放工，如果係都唔錯，可以慳番啲油錢，大家只係好朋友啫。」吳啟華就話：「同Ada私下冇聯絡，我𠵱家只想快啲結婚，可以生BB做老竇。」
黎姿噚日啱啱喺成都返港，黎姿話得到契爺陳伯指點，幾年後會有真命天子出現，所以會隨緣靜待好時機。
羅慧娟同朱凱婷噚日喺電視城，出席無綫新節目《開心見城》開廠拜神儀式，佢哋將為節目擔任主持。
新節目內容主要針對遇到社會困境時，應該點處理，重會請嚟現實個案中嘅嘉賓現身說法，羅慧娟話：「今次做呢個節目見到好多嘢，有時同啲人做訪問會感動到一齊喊。」
劉永拋妻棄子，黎燕珊一個人撐起頭家，𠵱家黎燕珊以自己為榮，重成日勸其他單親媽咪，唔好睇唔開，佢話：「其實都只係一條毛咁小事，我以前都試過生不如死。」雖然黎燕珊同劉永冇兩句，但佢喺仔女面前，都叫佢兩個要尊重爸爸，父親節都要同爸爸慶祝。
葉蒨文同朱玲玲好鬼老友就係人都知，佢哋唔止一齊去街食飯睇騷，而且聽講佢哋重鍾意一齊返內地買A貨，即係質素較好嘅名牌假貨。
馮仁昭個老友話，佢哋兩個好鍾意去上海襄陽市場一間舖度入翻版LV手袋，每次都係大量入A貨，早排佢哋重買咗好多個㖭。
曾拍過《蘇絲黃的世界》嘅關南施，應香港旅遊發展局邀請，由美國返嚟義務宣傳香港嘅購物天堂熱點，推廣香港旅遊業。噚日關南施去咗銅鑼灣時代廣場豐澤電器世界，自費買咗電腦、電子手帳同數碼相機，埋單二萬一千多元，美國《E!Entertainment》電視攝製隊重全程跟住。
森森個仔李嘉豪細個時同謝霆鋒一間學校，重成日一齊開生日會，長大之後，兩個各有唔同發展。
森森噚日喺亞視話，冇特登借霆鋒件事叫個仔引以為鑑，但就周不時提醒個仔，發生任何事都要第一時間同屋企人講，因為大人始終經驗豐富。