隨着米路唔能夠神奇地連續五次帶領球隊晉身世盃最後十六強,中國亦正式結束喺濟州西歸浦嘅集訓。無巧不成話,同樣選擇西歸浦作訓練基地嘅斯洛文尼亞,在B組亦係兩戰出局,唔知咁樣能唔能夠證明濟州只係一個度假勝地,卻唔係一個集訓基地。
小記為採訪中國隊首次打入世界盃,已經逗留濟州接近二十日,從這大半個月觀察,濟州氣候宜人、風景如畫;陽光與海灘、小橋與瀑布;賭場與夜生活以及魚生、烤肉,如果唔係呢十幾日晝夜不斷工作,可享受濟州度假天堂嘅生活,實在是一樂也。去年中國成功晉身決賽周後,選擇了濟州西歸浦作為集訓基地,可惜經過兩場令人失望嘅賽事後,注定出局,未踢土耳其最後一仗,已買定機票在十四日「返歸」。
姑勿論今次中國隊嘅成敗得失,小記連日採訪國足成員,發現他們在濟州西歸浦嘅生活,應該高興時間比不愉快的多,抱着學習態度而來總好過妄想,起碼輕鬆啲。
另一支選擇西歸浦集訓嘅斯洛文尼亞,連敗兩仗後晉級無望,而他們明日在濟州對巴拉圭更成為一場無關痛癢賽事。中國和斯洛文尼亞兩支西歸浦球隊同樣「歸西」,相信只是巧合,並非因度假而疏於練習。