港股噚日窄幅上落，波幅唔超過一百點，恒指最後收11289，微升4點。
大市暫時冇明顯方向，好淡均按兵不動，等候消息出擊。噚日市場吹風話盈富基金（2800）第3季發售額同第2季一樣，都係60億元。如果屬實，則係利好消息，雖然政府想盡快套現，改善財政赤字，但遲些少至賣清盈富，其實唔會有好大問題，好過董特首剛正式連任，個市就即刻散。
地產股回升，支撐大市。港府削減居屋出售規模，改為增加貸款置業名額幫助市民買私樓，目的都係支持樓價唔好再跌，捱過呢段供求失衡嘅時間，令樓市重納升軌，負資產一族逐漸鬆縛，可以有餘錢消費，消費市場轉活，自然增加就業機會，在循環帶動下，經濟就會加快復甦，因此唔好亂咁鬧港府托市。短期大行對地產股評價，將係影響大市上落其中一個重要因素。
鞍鋼（347）升破頭肩底頸線1.26元阻力，收1.27元，技術利好，量度升幅1.45元，但成交稍嫌不足。如果市況相就，今日有機上試1.30元阻力，若見受阻，短炒可考慮先食胡，此外，若是高開低收兼跌穿1.26元，就要重新考慮短期走勢，修訂策略。
趙飛雲