既富安全感又見車廂闊落嘅富豪S402.0型號，最近代理引入升級新版，全車加有包圍及尾定翼等配備，令賣相看來更富活力感之餘，但車價卻依舊，無疑響同級車之中，倍見有多一份號召力噃！
記者、攝影：陳偉林
新車售價：$199,900
車輛提供：太古汽車（29238080）
雖然S40只係富豪眾多車系之中，一款中型嘅四門轎車，但車廂陳設亦甚為講究，前後排座椅皆以高級真皮鑲嵌而成之餘，前排仿桶形設計重畀到你有出眾嘅妥貼感。再者，駕駛席全方位電控組合，重有全車電窗、門邊電鏡、中央門鎖及電天窗，以及原廠冷氣連高級音響配搭，當然唔少得重有前後多個安全氣袋及充氣簾幕組合啦！
響歐洲眾多車款之中，來自瑞典富豪嘅S40車系不僅造型有個性，極具安全感嘅車架結構，更一直為車迷所稱許；家陣代理重引入埋S402.0型號嘅升級新版，加有車身前後泵把連整流器，重有兩邊車身裙腳，雙出式尾喉同原廠尾定翼組合，單係賣相經已教人感受有多一份活力感呢！
呢部S402.0以一台2.0公升直4DOHC偈，匹配5前速自動波箱，雖然性能不算超卓，惟低轉表現富韌力，起跑加速感覺有勁；而穩紮車底結構，加埋前輪柱式後輪多連桿組合，走彎更見平穩兼富循迹性高㗎！