恒指周線圖，連跌3個禮拜，恒指總共冇咗690點，跌幅5.8%。中移動（941）亦係連跌3個禮拜，股價總共冇咗3元，跌幅11%。中移動跑輸大市，亦都跑輸聯通（762），聯通3個禮拜內跌幅係8.3%。
中移動跌得厲害，啲中移動Call輪散得更慘，最熱門嘅9044同9029，3個禮拜前新高，𠵱家則新低。中移動已經超賣，再跌些少嘅機會唔係話冇，但幅度好有限，隨時嚟一鋪技術反彈，而勁度亦唔會細。
中移動Call輪，小小哋博反彈係時候，正路對象係9044。9044兩個月後到期，現價25仙，溢價3.3%，槓桿率9.7倍。槓桿率唔細，溢價從來未試過咁低。3.3%溢價算得係乜，正股係跳動快嘅大隻嘢，隨時半日已經有幾個巴仙郁動。其次對象係9029，呢件槓桿率去到13.1倍，郁起上嚟，比9044更誇張。
上實（363）近排企定喺16元上下，隻Call輪9092則縮吓縮吓得番24仙，8月杪到期，溢價0.3%，槓桿率6.6倍，好抵買。去到尾，正股升10%，隻輪升6成以上。
章 盛