市道不景氣，飲食業首當其衝，大型酒樓食肆相繼結業，然而有人辭官歸故里，亦有人漏夜趕科場，這是商業社會必然定律。就像這間剛開業的海鮮酒家，前身經營平價火鍋，但老闆眼看以平作賣點在市場已無空間，便把心一橫，將酒樓重新裝修，轉型走高格調路線，以舒適環境及中價海鮮吸引一班中產客。老闆倫哥更雄心萬丈，除了銅鑼灣的分店即將開張，他還在物色一個二萬呎或以上的舖位，打算將其飲食王國擴充至九龍，看來他真的充滿信心，要在這個逆市殺出一條新路。
記者：黃婉冰 攝影：楊錦文
來自澳洲的龍蝦少了兩隻巨型蝦拑，但就多了些肉，兼且肉質爽口，所以身價亦較高。最好的品嘗方法當然是做刺身，生食無興趣？另有芝士焗、上湯焗、椒鹽甚至起肉油炮龍蝦球都得，食完個身到頭爪，大廚會將所有隱藏在大蝦頭和爪內的肉統統起出，最特別又夠飽肚當然是首選泡飯，加入瑤柱、瘦肉粒、冬菜用上湯做泡飯，無嘥。
雪影是指炒鮮奶，鮮奶與蛋白混合，炒起來才可達至香而滑效果，油的份量和火候最考大廚的功夫，否則會變燶或油淋淋。炒鮮奶亦另有乾坤，墊有冬瓜絲，大廚特別撒上脆卜卜的蟹子增強口感，旁邊伴以小棠菜、豆腐和竹笙，菜名頗具詩情畫意。
龍是指白灼生蝦，鳳當然是指雞，老闆將兩者合併來個套餐大平賣，蝦是肉質較爽又有蝦味的海蝦，來自大陸的黃油走地雞採用原隻隔水蒸的方法來烹調，令雞味無得走，雞肉可以更原汁原味，蒸過後留低的雞汁，大廚會用來淋在雞上，為證明雞隻是即劏未入過雪櫃，會連同雞腸、肝和腎等一齊上枱，畀你由內食到外，完完整整地去品嘗。
「我哋係用走地雞，新鮮運到未經過雪藏，好新鮮，全部都原隻隔水蒸，雞味可以保留，用水浸會令雞味流失，散叫一隻要$160，𠵱家套餐連一斤白灼生蝦做特價都只係$128，好抵食，值得一試。」
一睇菜名就知這是一道素菜，外層是炸過的腐皮，內裏是三菇六耳，三菇即北菇、草菇、蘑菇，而六耳是指沙耳、雲耳、木耳、雪耳、黃耳、榆耳。所有材料切粒加調味料炒香，用炸腐皮包到實一實，淋上蠔油芡汁，圍上髮菜，材料傳統，做法創新，適合素食愛好者。
菜膽砂鍋雞鮑翅是另一抵食推介，條條粗過牙籤，可以用筷子品嘗的是頂級翅─頂青，翅身軟滑，身價拍得住天九翅，其矜貴程度可想而知。一鍋十二位用有二十両翅。用老雞、火腿、豬肉等先用十多個小時熬製上湯，配以原隻鮮雞、菜膽和翅，用火爐熱住上，食得夠晒豪氣。
這道菜是傳統生菜包的化身，材料由肉碎改成高級數的海鮮粒，鮮蝦粒、帶子粒、甘笋加爽口馬蹄粒，三樣材料一同落鑊炒香，大廚特意加入馬蹄粒，讓海鮮粒變得爽脆可口，綴以炸得脆卜卜的炸米粉，自己落手落腳生菜片包住食，用手品嘗夠晒滋味。
電話：25206680
地址：灣仔駱克道72-86號熙華大廈2字樓全層
座位：600個
營業時間：上午7時至午夜12時
付款方法：現金及信用卡（Visa,Master）