「大學教育資助委員會」發表嘅《高等教育報告》，提議大學教職員薪酬與公僕脫鈎，引起一啲教授抗議，佢哋認為脫鈎之後，薪酬靠「表現評估」performanceassessment，而評估由上司寫，好容易造成奉承擦鞋文化喎。
商界寫職員嘅assessment，寫到慣，下屬唔同意，可以寫番一份「異議」，連同評估表交番畀人力資源部仲裁，左丁山以前寫得人多，亦俾人寫，從來都冇人擦我鞋，自己亦冇擦老細鞋。
點解啲教授驚得咁緊要呢？佢哋都係飽學之士，照理全部都有學術良心，平時教學生做事公正，冇理由鍾意做擦鞋仔啩；假如佢哋真係擦鞋，眾校委應該乘機削減人手，削之哉！
透明度係阻止擦鞋最有效嘅方法。
聽講瑞安集團主席羅康瑞注重managementbyresults，每年為自己訂下「表現目標」，年尾就由身邊啲高層人員評估佢、畀分。要夥計畀分，豈非製造擦鞋仔？非也，羅康瑞嘅妙計就係將每份對佢嘅評估，在高層之中傳閱，於是邊個擦鞋、盲目讚好嘅話，就會俾其他人知道，成為被取笑嘅對象。
呢條橋幾高㗎，不過做老細最重要嘅一回事就係是否將評估表視為「官僚廢紙」，知而不行。苟如是，大家虛應故事，唔得認真，公司就冇前途咯。