煤氣公司搞「萬糭同心為公益」，既送愛心糭畀長者，又義賣籌款，昨日重搵埋三位立法會議員：李柱銘、余若薇同楊森一齊包糭。
果然俾八方估中，三個議員都承認咁大個人未試過包糭，所以正式埋牙時，每人身邊都有個經驗豐富嘅婆婆傍住，婆婆重牢牢掌握住糭葉嘅主權，馬丁（李柱銘）同Audrey（余若薇）雞手鴨腳，只係負責「倒米」，即係將糭料同糯米逐一倒入糭葉裏面，再由手勢純熟嘅婆婆包靚隻糭，只有楊森識得自己包。講到食糭，馬丁原來唔鍾意食肉，所以佢食齋餡，肉餡就由太太負責。
活動中馬丁同Audrey都有絕招𠱁老人家，馬丁自爆重有三百六十四日就可以攞長者卡，即係六十五歲，一於拉近大家距離。Audrey就回憶自己淨係試過一次親手整傳統食物，原來係三十幾年前幫阿媽煮八寶飯，所以今次包糭好難得。
講番余若薇，佢噚日晨早七點幾就被三個女搞醒，不過佢唔單止無嬲，重笑到甜絲絲。原來三個女走嚟床邊，拎張自製早餐Menu請爹哋媽咪點菜。因為其中一個女噚晚就要飛返外國讀書，所以要提早慶祝父親節。
Audrey形容話餐單好似酒店咁專業，有得揀鮮榨橙汁定蘋果汁，又有焗多士又有朱古力華夫；重有價錢：7years/15years/17yearsunconditionedfatherlylove!（七年?十五年?十七年無條件的父愛；Audrey三位千金分別七歲、十五歲同十七歲。）結果呢一餐愛心早餐，就冧掂Audrey兩公婆。
（圖）馬丁（左一）同余若薇（左三）齊齊包糭，不過只有「倒米」的份兒。
傳真︰2623-9278
電郵︰