最近天氣時晴時雨、時涼時熱，袋內有件薄風褸傍身就最啱！有見及此，小記今趟就特別為大家介紹名牌子THENORTHFACE，喺沙田舉行嘅開倉大行動，當中多款薄身跣水風褸均以超筍價發售，再加埋爬山鞋及背囊等產品，全場貨品超過五千件，全部以低於半價出售，雖然開倉位置交通唔係咁方便，不過小記認為都值得去逛逛！
記者：許穗齡 攝影：陳穎 ImageGirl：Marcella
風褸款式萬變不離其宗，所以靚色就成為消費者考慮嘅因素之一，呢款淺藍色嘅風褸，顏色夠靚，款式襟興，手袖邊以灰色直條作襯托，着上身夠晒青春。風褸以人造纖維製，具跣水功能，褸帽可收於領位，𠵱家$200有一件，當便服着都好有型。
適合春夏天穿着嘅風褸，質料多以一層過，以免太過焗身，不過如果嫌無裡的風褸褸身太薄的話，可以考慮呢件半裡嘅褸款。人造纖維製嘅跣水風褸上半部有裡，令到衫身較挺，着上身靚好多，顏色方面有黃色、紅色、灰色、藍色及黑色等選擇，𠵱家開倉價只需$250，絕對買得過。
鍾意戶外活動嘅朋友，通常會隨身帶備一件風褸，以免入夜之後會着涼。今次開倉，呢款可以變背心嘅長袖跣水風褸，絕對係一個好選擇。人造纖維製嘅杏色風褸，袖位設有拉鏈，脫去袖後便變成一件背心，靈活實用！
呢件以人造纖維製嘅風褸，講真款式唔算好靚，設計亦嫌太過單調，適合年紀較大的人士穿着。風褸具跣水功能，可以抵擋微雨，以呢個牌子嚟講，唔使$100就有交易，絕對是超筍貨色，有紅色、黃色及藍色選擇。
行山鞋款式多數較平實，呢對越野行山鞋就屬於靚仔款式之一，鞋面選用網面加人造皮，橡膠鞋底的中底有碳纖維加強承托力，講款式講質料都屬正貨，開倉半價發售的確抵買。
行到山區少不免會接觸到山澗，呢款選用防水料加高筒的設計就大派用場。行山鞋以防水麖皮加橡膠鞋底，再配埋高身鞋筒設計，屬專業者之選，開倉以低於半價發售，$300有一對，愛行山嘅朋友萬勿錯過。
開始又踏進旅遊的旺季，若打算到鄰近國家玩幾日的話，呢個手抽旅行袋相信啱晒你用。尼龍製的旅行袋附有長孭帶，有黑色、灰色及藍色等選擇，𠵱家由原價近六百狂冧至$200一個，當然買得過啦！
THENORTHFACE的背囊一向都甚受歡迎，難得開倉當然要掃番個，呢款以防水尼龍製嘅背囊容量約有3.5Litre，屬中等尺碼，一般行山都夠用，袋面更有一個膠扣，方便用來鈎放雜物，登山或去戶外玩都啱用！
日期：即日起至6月22日
時間：星期一至五（11:00am-7:00pm）
星期六至日（11:00am-5:00pm）
地點：沙田小瀝源安平街8號偉達中心15樓1507室
查詢電話：26350336
＊只收現金