【本報訊】「全家都當我工人咁使，做餐死又冇人讚，我唔死都冇用呀！」一名婦人盡心盡力照顧家庭，卻未獲家人讚賞及慰勞，昨日她在牛池灣一個公園內，疑一時感觸淚灑當場，大吐苦水，並情緒激動「要生要死」，途人以為她意欲輕生報案。警員到場開解平復心情後，她由兒子接走。
情緒激動的婦人姓麥（五十七歲），育有兩子一女，姓譚丈夫已退休，一家住彩雲邨。
昨晨八時許，麥婦在坪石邨公園晨運後獨自坐在石櫈上沉思，其間疑她看見別人在「家庭日」享受天倫之樂，一時觸景傷情黯然垂淚，有晨運客見狀上前安慰，她遂按捺不住抓着對方「盡訴心中情」。
麥婦哭說：「嗚……捱大晒啲仔女冇用㗎！冇人會照顧我，家用又畀得少，成日以為我儲埋好多私己……我一年三百六十五日都冇得休息，做餐死又冇人讚，全家當我工人咁使，都冇理過我嘅感受，好心淡，我真係唔死都冇用呀！」晨運客恐她做出儍事報警。
接報到場警員紛紛開解說：「你不如多啲出嚟同人傾偈，識多啲朋友開心吓！啲仔女咁大個要識得照顧自己，你唔好再服侍佢哋喇！」公園職員又勸說：「你係一家之主大晒㗎嘛！屋企人嫌啲餸煮得唔好食，咪唔好理佢哋囉！盞寵壞晒，佢哋見冇其他嘢食就自然會食㗎啦！」麥婦聽罷情緒漸漸平復，警員事後通知其子將她接走。