陳松伶（松松）早排喺無綫《智在必得》節目入面，贏咗一層價值八十八萬嘅廣州鳳凰城碧桂園嘅花園洋樓，前日松松就專誠去咗廣州收樓，點知簽契嘅時候，地產商竟然問佢有冇興趣拍埋樓盤廣告，令到松松不知幾咁興奮。
松松話：「我俾人盜用咗姓名同身份證之後，已經將名下物業同車轉晒名，但呢間屋嘅合約規定一年後先可以轉，不過，我諗都冇事嘅。」
松松對於呢間新洋樓話不知幾咁滿意，面積二千一百呎，包括一個主人套房、兩間客房同一個書房，而且有花園之餘天台重有韆鞦架，真係好鬼豪華，松松話：「我個肥家姐成日同我爭廁所，𠵱家嘅新屋有三個廁所，大家唔使爭啦。」
陳寶珠個仔楊天經同李惠敏噚日喺銅鑼灣幫有線「2002香港兒童競選大賽」做評判，楊天經重做埋「非凡大使」。
楊天經話：「喺遲啲鄧麗君嘅舞台劇度，我會同彭羚有身體接觸。」當記者問佢點樣身體接觸？佢就叫記者唔使咁緊張，重話：「跳舞啫，我都唔係咁嘅人。」
同好友李美鳳一樣係嫁去台灣、丈夫蔡充經營食肆嘅邱海寧，噚日喺金鐘太古廣場逛街。
呢排台灣旱災，又發生空難，邱海寧話佢都好擔心，佢話：「台灣嘅環境真係麻麻哋，我以後都唔會搭華航㗎啦，我同先生都有考慮過搬返嚟香港住，不過喺度嘅物業都租出咗。」
舒淇前晚獨自出現赤鱲角機場，佢一身便服打扮，頭戴漁夫帽，記者見狀立即走上前追訪。但舒淇見到記者即忙於講手提電話，然後佢又急步走去搭電梯離開。記者再問舒淇喺邊度返嚟，佢依然係冇回應。舒淇對記者咁恐懼，問極都唔答，確實令人莫名其妙。
陳司翰（Victor）近日為電影《鳥與夢飛行》唱主題曲《愛在他們的天空》，佢重搵李思菘幫佢作曲，同埋去星洲錄音。Victor話能夠主唱《愛》曲，覺得好開心，日前佢在宣傳影帶中話：「呢套片用咗五年時間製作，我都有睇過，覺得好有教育意義，場面好壯觀。因為套戲嘅劇情係圍繞雀鳥，我自己都好想可以好似雀仔咁飛，所以演繹首歌時都感同身受。」
古巨基噚日由北京返香港為卡通電影《一家之鼠超力仔2》配音，基仔雖然好耐唔喺香港，但都有留意最近嘅新聞，對於蘇永康喺台灣俾人搜到身藏搖頭丸，基仔話：「件事都未清楚，我唔方便講咁多嘢，但係我當然唔希望啲人食丸仔啦！我亦都唔相信康仔做啲咁嘅事。」
黃耀明前晚獨自出現中環蘭桂坊，佢穿一身便服，見到記者時唔係好自然。問黃耀明知唔知道蘇永康喺台灣蒲吧，被發現身上藏有搖頭丸而被捕，黃耀明聽完記者嘅問題，就好敏感咁話：「我同佢都唔熟。」然後佢就好快咁走開咗。
黃柏高決定留喺正東唱片，九月唔會跟鄭東漢離開，之不過佢同鄭東漢、嘉禾高層諸兆俊合作搞嘅金牌經理人公司，鄭東漢股份最大，將來鄭離開環球，呢間經理人公司都可能出現變化，所以黃柏高最近好似想搞多一間經理人公司，而呢間公司自不然由佢自己做大股東，以佢手頭上嘅藝人，佢搞公司一定冇問題。