世界盃開鑼，身邊好多女性朋友投訴，話俾男友冷落而大吐苦水，就連早前每日喺啲二三線股仔炒嚟炒去嘅股友都大叫無癮，皆因好多大戶同散戶都走咗去睇波，唔留戀個咁悶嘅市場，加上外圍偏軟，恒指唔經唔覺就跌咗落去250日線附近，喺呢一個水平好難講究竟應該買上定買落，真係重難過估過邊一隊攞今屆世界盃。
雖然話個市好悶，唔係咁易吸引到投資者入市，尤其係啲早前炒到㷫烚烚嘅股仔，呢間又話注資，嗰間又話會有收購活動，結果好多到最後都係無咗件事。講番轉頭，4月時話有新股東入股嘅光通數網（155），照計劃而行應該會喺今個星期改名為御泰國際，早前大股東話過會有新項目注入去，藉此救番生隻股仔。
根據傳統股場智慧，當一隻股仔有新股東入主而改名嘅時候，班炒家都會唔理三七二十一入去炒一轉，去等新股東公布新注資方案嘅一刻。呢隻股嘅業務基本上已經所剩無幾，所以照計會有啲憧憬，伏勝認為大家呢個禮拜不妨睇睇呢隻股。由於隻股仍然係位列仙班，分分鐘可以升十零個巴仙都話唔埋，但幾時要走就真係要考各位嘅眼光。
上個禮拜國內除咗公布會減慢A股發行速度，另一方面亦傳緊國內7月份會推出埋有關境外人士與國內證券行成立合營公司嘅新守則。有位行家話，有知情人士已經見過份守則嘅藍本，話應該會對於加快推行QDII及QFII有非常大嘅幫助，所以有部份資金已經急不及待來港想炒番一轉。據呢位知情人分析，話呢個新例對𠵱家喺國內已經有業務嘅股票行特別有利，叫伏勝不妨留意吓幾隻早前炒開嘅股份，例如申銀萬國（218）同埋隻第一上海（277），話應該唔會令大家失望喎。
伏勝