701收料站:外資行接力炒德發

701收料站:外資行接力炒德發

上市唔係好耐嘅德發(928),上市時剛剛遇啱成衣股如德永佳(321)等升到停唔到掣,加上包銷認購新股嘅大陸炒家夠疏爽,放足錢嚟炒,所以股價係咁升,惹來唔少人跟風上車。
雖然隻股之前回落咗少少,但經紀黃就話,重有機會再炒上,但幕後嘅班底,就會由大陸炒家轉為芬佬。
德發4月底以每股38.5仙招股上市,當時成批貨由大陸炒家認晒,結果喺佢哋嘅海派作風下,最高升至79仙,收尾包銷商行使超額配股權,同埋大陸炒家散咗大批貨後,股價回落至60仙樓下,但好彩仍高出招股價好多。

芬佬睇好成衣股
經紀黃話,近排見到德發股價同埋成交好番好多,原因係外資行有動作。
事實上,喺大陸搞零售嘅成衣股都為芬佬睇好,德發做開泳衣,又在大陸搞「藍貓」品牌,睇怕鬼佬都會受落。
慕容小初