自從朱燕珍男友俾警察槍傷之後，朱燕珍日日都去醫院照顧男友，佢老友寶珮如同男友，重有陳明君亦都日日去醫院探望。噚日寶珮如透露朱燕珍男友情況，佢話：「佢今日精神幾好，聽日就可以拆晒身上嘅喉管，𠵱家食流質食物。」至於朱燕珍噚日一早就去咗醫院，記者想請佢做訪問，陳明君就話：「佢唔影相呀，佢今日開始都唔會再講嘢。」
內地女演員瞿穎帶挈港姐朱凱婷，事關瞿穎原定聽日嚟香港出席香港旅遊發展局主辦嘅「滙豐香港新世紀勁買」活動。不過佢日前喺內地拍新劇《真情告別》時，唔小心整親隻腳，呢排佢都需要坐輪椅參與拍攝。瞿穎因為隻腳傷咗，決定唔嚟香港，大會臨時搵咗港姐朱凱婷代替。
傅珮嘉噚日喺銅鑼灣崇光百貨出席活動，派日本手卷，但俾護衞驅趕。問佢有乜感受，佢話：「冇乜嘢！都唔關我事，我嚟做嘢之嘛！」
提到傅珮嘉好友張栢芝嘅緋聞男友謝霆鋒遭起訴，問佢有冇打畀栢芝，佢話：「我想講番上次有報道話我同栢芝劃清界線，我覺得朋友唔需要日日打電話，朋友係講心嘅。佢同霆鋒嘅嘢，我唔再講。」另外，傅珮嘉會出一本散文，佢話：「本書都有講栢芝，但我唔會開名，等你哋估。」
賭王何鴻燊同四姨太梁安琪生嗰個女Sabrina，前晚喺保鑣同埋保母陪同下，去咗灣仔演藝學院睇「我要高飛」歌舞劇。佢一見記者影相，即刻好合作咁企定任影，咁細個已經有名媛風範，真係難得。相反隨行嘅保
施念慈噚日去中環出席一個化妝品公司活動。佢講開近排好忙，原來佢要喺三個月內寫起六、七本書，近日就忙緊同陳芷菁合作寫書，預計喺下月書展時候會推出。其實大部份作家鍾意夜晚創作，貪夜闌人靜，思維容易集中，但施念慈就鍾意晨早起身寫書，效率好啲喎。
葉世榮同台灣樂隊星盒子噚日去尖沙嘴出席「國際搖滾音樂會」記招。世榮話音樂會下個月十一、十二號喺灣仔伊館舉行，到時重有嚟自唔同國家嘅樂隊一齊表演。問世榮最近忙緊乜？佢話：「忙緊製作新碟同埋頻頻去內地演出，因為內地有好多酒吧show，做多啲可以累積演出經驗。」
韓國電影《我的野蠻女友》喺香港大賣，早排商台主持人劉偉恒去咗韓國，訪問咗唱主題曲《IBelieve》嘅歌手申昇勳，原來梁漢文唱嘅《纏綿遊戲》都係由佢作曲，佢重讚梁漢文唱得好好。申昇勳喺香港藝人入面，最鍾意華仔劉德華，華仔嘅電影《天若有情》係佢最鍾意嘅作品，佢重話喺九三年試過同華仔同台演出，好想有機會再同佢合作。