九倉噚日開股東會，吳光正再度以主席身份見小股東，但即刻遇上投訴。批股東唔係投訴九倉，而係質問點解九倉前年賣寶福時招呼都唔打，令佢哋根本無法沽貨，班小股東甚至要求前主席李唯仁引咎辭職。
見慣大場面的吳主席當然早有準備，兩三招就耍開咗，佢重深明「雞髀打人牙骱軟」道理，為了安撫班小股東，除咗同早兩年一樣，向大家派發點心券外，今年更悉心安排，唔使小股東排隊換點心，而係坐定定，有專人一個個禮盒奉上，難怪好多小股東鬧完之後，都拍晒手支持吳主席。
八方重發覺九倉十分敬老，在開會時先花十五分鐘時間，向在場公公、婆婆介紹集團業務，然後再過其他議程，認真有心。
講起九倉，八方最關心就係海運大廈幾時有摩天輪玩；聽佢哋話，現在乜都唔郁得，起碼要到九月，咦，咁咪白白拖半年？原來，有關方面接到一個反對意見，好似話擔心結構問題，因為個摩天輪嘅位置，係某某地殼斷層云云。咁就半年，重話搞旅遊刺激經濟，刺鬼刺馬咩，所以唔好鬧董先生議而不決，唔好鬧大嶼山吊車得個講字喇。
傳真︰2623-9278
電郵︰