連卡佛前晚與恒生白金卡合作，假尖沙嘴店內舉行fashionshow，大部份演出的模特兒，都對世界盃賽事十分關注。而歐陽妙芝更於年半前旅遊意大利時，有幸在意大利隊隊長馬甸尼家中作客，但卻與馬甸尼緣慳一面，然而這個經歷已教她一班朋友羨慕不已。
世界盃賽事掀起廣大球迷的關注，連一班平時舉止斯文的模特兒，都對世盃賽事十分着迷。前晚一眾有份為連卡佛fashionshow演出的模特兒，都與在場記者大談波經。
其中歐陽妙芝有一個叫人十分羨慕的經歷，她說：「我本來唔係十分迷足球嘅，但係喺年半前，我同班朋友去意大利旅行，有一日我嘅意大利朋友話帶我去佢一個朋友屋企玩，去到嗰間屋時，第一個感覺係，嘩！乜間屋咁靚嘅，又大又有𨋢，十足好似間俱樂部咁，而屋裏面重擺滿好多張靚仔相，睇真啲有啲熟口面，原來就係意大利隊隊長馬甸尼，而招呼我嗰個就係馬甸尼嘅太太嘞！」
歐陽妙芝愈談愈興奮，她續說：「佢哋個仔重好活潑，通屋跑，阿馬甸尼太太重同我哋講，佢老公就快返，叫我哋等埋佢先走，不過我哋梗係唔好意思啦，不過我哋成班人都當咗馬甸尼間屋係名勝咁，四處影相留念。」
而名模陳嘉容亦對今屆世界盃十分留意，她說：「好多時晏晝做嘢，已經有咗部份賽果，我都專登唔聽，留番夜晚返屋企睇錄影帶。」至於最喜歡哪一位球星？陳嘉容說：「我同大部份球迷一樣，都係最迷碧咸同中田英壽。」
問她晚上睇波，少不免會吃零食，不怕因此致肥嗎？陳嘉容說：「唔會，我好節制嘅，睇波嘅時候只會飲湯，但係Ricky（其男友）就會飲啤酒同埋食零食。」而周汶錡雖然捧德國隊，但最喜歡靚仔球星碧咸。