香港人氣偶像Twins呢排出碟，聽聞反應好，因為隨碟附送時下流行嘅Figure公仔，好多𡃁仔𡃁妹都為公仔買碟。
經紀李應該唔係Twins迷，只迷日本AV女郎，都打電話嚟問隻公仔係咪好掂？重非常關心炒價，諗落事有蹺蹊。農曆年時佢曾打探大頭狗行情，隨即有大批翻版見街，莫非今次睇中Twins？
經紀李解釋：「我不過係跑腿，人哋大公司點敢得罪呀？其他老細想探路，問吓行情啫。」經紀佬講嘢只可信三成，況且經紀李背後有B貨專家稱號，佢問得嘅貨話唔定已經被佢睇中咗，成為下一個翻版目標。
呢套公仔有成四款，要儲齊有一定難度，正是翻版貨入侵好機會，睇嚟有貨嘅最好早走，只宜短炒。還記得之前有公仔創作人嘅作品，被翻版貨打亂巿場，經紀李曾漏口風：「翻版商人取易不取難，設計愈簡單同成本愈輕，翻版商最愛。」即係話落重啲成本，就係對付翻版嘅最好辦法。
主持人：大食Jack
八卦熱報：