有博彩公司喺聯賽賽季時，會將每個禮拜英超聯賽事嘅盤提早一、兩日開售，即係我哋俗稱嘅「早飛盤」。世界盃期間亦見有呢類提早開售嘅盤口出現，究竟呢啲「早飛盤」係咪真係咁值得捧場呢？
其實有心玩嘅話，就算唔一早去馬，到最後就點都會有心水「出手」嘅，相信呢個心態好多人都會有；而且臨場嘅盤口亦不時會有變化，有唔少人就會睇埋當中玄機，至可以確定到究竟捧邊隊；重有就係球隊軍情好重要，邊個唔出得邊個有傷咁，亦唔係可以一早預知到嘅。照咁講，睇嚟「早飛盤」真係好似有啲多餘咁喎？
其實有時捧「早飛盤」都唔係無着數嘅，就好似𠵱家世界盃咁，喺五月初已經有博彩公司開晒四十八場分組賽盤口，𠵱家睇番當時嘅盤，發覺有好多都算開得保守；例如今日嘅賽事，巴西只讓中國球半、意大利讓克羅地亞半球咁，原因就在於未開波之前，莊家都好似大家咁，重未完全掌握到臨場實際情況。尤其世界盃呢啲大賽，隊隊都有番咁上吓實力，又點會夠膽一早就開到巴西讓三球、意大利讓球半嘅盤口吖！
結論唔係馬後炮，而係想講喺呢個世界盃嘅「早飛盤」入面，真係會有唔少開錯盤嘅情況。一局棋入面，只要有一方行錯一步，對手就可以有較大贏面；套入呢個理論，即係大家捧「早飛盤」場，少咗臨場嘅更多考慮因素，簡單啲去分析吓，贏面隨時大幅提升。嚟緊嘅第三輪賽事，葡萄牙𠵱家重讓緊南韓半球/一球，下盤點睇呀？
文：華度