張栢芝昨日為李克勤的音樂特輯開工，原本表示不接受訪問的她，卻忽然大開金口，指自己食得瞓得，心情極靚，看來並未受到男友謝霆鋒昨日提堂一事影響。
被廉署起訴串謀妨礙司法公正的謝霆鋒，昨日到西區法院接受審訊，而其女友張栢芝昨日則前往中環，拍攝李克勤音樂特輯。穿上吊帶背心及長裙的栢芝，昨日心情靚透，除跟記者、克勤及黃伊汶等人有講有笑外，又跳跳紮去雪糕車買雪糕及與紋身外籍人士合照，其過度活躍的表現，反而令人感到有點不尋常。
問栢芝現時與霆鋒究竟是甚麼關係時，栢芝竟笑笑口說：「呢啲唔需要同你哋講。」栢芝這個答案，實在耐人尋味。不僅是她與霆鋒的關係，就連問她有沒有致電慰問霆鋒，栢芝也以不需向人交代為由，拒絕透露。栢芝說：「我做artist（藝人），做嘢嘅時候會化好妝、着好靚衫做訪問，但我自己私下做任何嘢，唔需要同人交代。」
不過，栢芝又表示近日她體重上升，已沒有之前般瘦，她說：「自己肥番，如果唔係又俾你哋話我厭食症咁恐怖，𠵱家我吸收到又瞓到，所以冇食安眠藥，拍戲一日三餐，體重都有一百一十磅。」
原來昨日上午栢芝曾與李克勤拍攝一場哭泣場面，栢芝收放自如的表現，令克勤讚歎不已。不過，栢芝強調自己拍喊戲時甚麼也不去想，始能哭得出來。
而克勤亦代栢芝否認她是因為有感而發才喊出來，克勤說：「呢啲係演技表現，佢冇嘢，心情好靚，同個樣一樣，佢重同我講波㖭。」未知栢芝可有向克勤提及霆鋒的事情？克勤耍手擰頭說：「呢啲唔好講，人哋心情咁好，一陣激嬲佢拍唔到，真係賴你哋，其實栢芝表面女性化，但內裏男性化，佢個人好爽㗎。」
提到近日有雜誌到栢芝大埔康樂園的家偷她的垃圾，對此栢芝不滿地說：「黐線！我當垃圾佢當寶，𠵱家我搵保安睇實啲垃圾，啲人一掂親就報警拉人。」
此外，克勤表示這次的音樂特輯除有栢芝、黃伊汶和郭可盈助陣外，更邀得劉德華演司機，而梁詠琪和陳慧珊亦會友情演出。
採訪：李珮洳 攝影：羅德光