噚日巴西班兵嚟到濟州世界盃球場練波，過程就認真輕鬆到極，個個隊員笑容滿面，重不時扮打交開玩笑，同中國球員個個「揦口揦面」相比，係胸有成竹定係輕敵呢？
巴西練波打分隊賽時，要求多多嘅史高拉利經常叫停，捉住球員講解戰術，搞到朗拿度好鬼無癮，頻頻打呵欠示威。
中國記者會一向守衞森嚴，但噚日就一反常態，一個中國球迷竟然混咗入去，重同米路講，中國第一場輸了，球迷好唔開心，米路就用普通話回應：「冇問題、冇問題」。
平時有問必答嘅米路，噚日在記者會就一反常態，經常帶記者遊花園；記者問佢係唔係打四五一，佢就答打十一人足球，問佢會唔會死守，佢就話同以前冇分別，搞到中外行家都好無癮。