現時業界正處於五窮六絕時期，再加上世界盃成全球注目焦點，市面真係好鬼靜，不過只要有橋一樣掂，而且橋唔怕舊，最緊要受。今年特別多翻炒作品推出，繼早前《足球小將》、《龍珠》之外，Konami亦喺星期四推出GBA《惡魔城~白夜之協奏曲》。相比之前兩隻翻炒作品，今次GBA版無論遊戲水準、畫面質素都絕對拍得住PS版，一如鐵人上星期所料，星期二首日到港立即引來炒風，深水埗售價就由$290炒到上接近$400，重要係有價有市，到截稿前坊間約售$350左右，都尚算合理，所以如果見到有貨，價錢合理就要掃。
讀者如果擁有GBA，都會抱怨喺較暗嘅環境下玩Game，尤其喺巴士或地鐵，如果唔企正喺光源下，要玩GBA相信都會幾辛苦。好多人問鐵人GBA有邊款光燈好用，鐵人今次就扮吓專家畀啲建議大家啦！
購入重點：
1.選擇用獨立電源嘅光燈。坊間所有由GBA主機取電光燈不止加快消耗電池壽命，更會佔用機上對打線位置，實屬下下之選。
2.光燈最好可以調校光源角度，減少螢幕反光情況出現。
3.部份舖頭會有光燈陳列比較，不妨多問店員。
4.坊間部份舖頭有代客加內置光源GBA服務，值唔值得改就要睇師傅質素同內置光燈耗電程度，鐵人短期內會測試一下，下星期再同大家報告。
正所謂猛虎不敵地頭蟲，除咗波蘭喺日韓世界盃輸咗畀南韓外，微軟XBOX亦喺首回合日本主機大戰失利，前排更被日本傳媒用「銷售鈍化」嚟形容目前日本版XBOX慘淡嘅銷售情況，都咪話唔冇面。其實以微軟XBOX目前喺日本嘅軟件數目，想翻身真係要望有奇迹出現，不過有睇過北美XBOX嘅發售表都知道，北美先係微軟主要市場，軟件不止數目多，大作重比比皆是，一眾擁有日本XBOX嘅機主真係淨得個「恨」字。
所以前排推出嘅全區碼晶片真係及時雨，姑勿論晶片本身合法與否，但係鐵人近日巡場真係發覺多咗人買XBOX，亦多咗舖頭擺放XBOX配件同遊戲，實屬機迷之福，遊戲市場要百家爭鳴先好玩嘛！𠵱家坊間全區碼XBOX約售$2,300，咁高性能又有HardDisk又有LanCard上網，真係好抵買！
文：打機鐵人