世界盃開始咗之後，相信好多朋友屋企啲零食即食麵飲品都消耗得好快，趁周末就要到超市入定啲「睇波必需品」，事關選擇多之餘，重有好多都有特價，加加埋埋可以慳番唔少。今次小記就喺惠康揀咗啲抵食嘅零食飲品畀大家參考。
記者：謝翠玲 攝影：伍慶泉 Model：Simone
零食類
薯片係眾多零食裏面最受歡迎嘅頭位食品，尤其是坐定定睇波時口痕痕就想食。呢隻FirstChoice薯片口味選擇都唔少，有燒烤、蕃茄、芝士同香辣味。呢隻110克嘅薯片全部有特價，大家可以考慮一下。
冰冰涼涼嘅雪糕喺睇波睇到㷫烚烚時食就最啱，可以幫大家冷靜一下太興奮嘅情緒。而且啱啱雀巢杯裝雪糕做緊非常抵嘅特價，全部共六種口味都係$12/4杯，而原價要成$6.5杯，平咗超過一半，又點可以唔入貨。
新年鍾意送罐裝曲奇，但講到平日買嚟做零食，當然係細細包嗰啲曲奇較受歡迎。而其中又以較為大塊又脆又鬆嘅家庭風味曲奇最啱口味。呢隻曲奇做緊買一送一嘅特價，有花生、朱古力碎、果仁同原味牛油。
四方果啫喱仔多年來都係小朋友嘅零食至愛，尤其是夏天就最啱食。唔得閒自己整啫喱嘅媽媽趁平買定啲放儲存櫃就最啱。每盒四方果啫喱平咗$1.8，慳番嘅錢幾乎可以買多五盒啫喱，有五種口味選擇㗎。
飽肚食品
細細條，方便又易食嘅嘉頓迷你蛋卷一向都係好多朋友醫肚嘅方便選擇，特別係忙到唔得閒坐定定去食一餐飯嘅朋友就最鍾意放定啲蛋卷喺就手嘅地方，𠵱家擁有多種口味嘅迷你蛋卷特價只需十元買到三包，非常抵食。
平日食嘅即食麵都不出嗰兩大牌子，其實都有其他同樣快捷方便又好味嘅即食麵可以選擇嘅。好似呢隻同樣有多種口味嘅農心麵，味道麵質都唔錯，呢種緹魚口味嘅即食湯麵五包裝都平咗啲，不妨買嚟一試。
飲品類
啤酒汽水係睇波時最受歡迎嘅飲品。𠵱家可口可樂八罐裝做緊特價，比原價平$17有多。除咗原味嘅紅罐可口可樂，健怡可樂同健怡檸檬可樂都一樣係特價，怕肥嘅都飲得。
維他出品嘅果然系茶六盒裝都有做特價。味道唔太甜，有蘋果、荔枝等選擇，買嚟除咗喺屋企飲，亦可以俾小朋友帶返學校做下午茶飲品。
呢隻同治堂健康工房推出嘅天然飲品，單一係500毫升裝，有金盞菊花、野棗、夏枯草同杜仲茶四種口味，全部成份天然。𠵱家買二送一嘅，非常抵飲。
其他特價精選
牛奶其實唔一定只係小朋友飲，大人都應該每日飲嚟增強體質。三花呢隻高鈣脫脂奶粉就比較啱大人飲用。大罐1.8千克罐嘅奶粉平日正價要成$141罐，𠵱家特價除咗平咗超過二十蚊，重有八包一杯份量嘅奶粉送。
食食埋埋咁多熱氣嘢，都要食番啲水果清清腸胃同幫助消化。𠵱家新奇士橙散裝嘅有特價，原價$3.5個，特價就平咗一蚊，呢隻算係中等Size嘅橙，唔大唔細最啱飯後食。