小E三十歲考車牌，斷斷續續學車兩年幾，考咗三次先至考到車牌，好不開心，佢個世叔知道之後，就同佢講：「喂我架三年車Corolla，不如賣咗畀你，我正想換架新車。」世叔半賣半送益世姪，只收兩萬，小E梗係開心，即刻話要。
買車第一件事就係先買保險，小E問滙豐，職員知道佢係新牌仔，即刻話No，請佢幫襯第二間。小E於是打電話問AIA、藍十字、太平洋、中國保險，逐間話唔做新牌保險，小E為之氣短，換一間相熟車房代問滙豐，有冇人情講。滙豐職員對車房講：「新牌仔嘅出事率好高。現在第三者保險賠償可大可小，最高可達一億元，點保呀？索性全行唔做咯。」
咁嘅情形，畀我都怕做啦，蝕本機會好高啫。小E就好氣頂：「唉，啲保險公司話最少都要有一年牌先至肯保，但我一年內買唔到車，唔揸車，一年後咪又係新牌仔？邊有經驗累積啫，政府發車牌又有乜嘢作用！」
小E講得未嘗無理，樣樣都會有第一次，冇第一次就唔會有經驗，買唔到保險小E就買唔到車，點會有第一次，美國保險公司對二十一歲以下嘅司機，保險費收得特別重，但冇話拒絕投保嘅。左丁山對小E講：「不如去平等機會委員會申訴：講被剝奪駕車權利。睇吓胡紅玉有冇辦法幫到你！」