巴西，相信好多香港人都係森巴擁躉，老實講，小記亦係其中一分子，身為中國人（香港人），今日場（中巴大戰）究竟幫邊隊？中國人唔幫中國人係咪有問題？
以前，巴西的確令人沉迷，進攻足球使好多球迷追隨，之不過今日創造性唔高，欠悅目。不過，今時今日巴西真係令好多人失望，今仗中國實力同對手係有差距，但若果打出同南韓一樣嘅拼搏精神，輸一、兩球都已經有交代。小記就喺酒店見到個香港球迷，佢話心情都好矛盾，既係中國人、又係巴西迷，但到場最後都會替中國隊打氣。
雖然世界盃已經開始成個幾禮拜，但中國對巴西先至係濟州第一場比賽，西歸浦市總算有世界盃氣氛，最重要係巴西球迷嚟呢度。
比起光州，濟州對睇波球迷來講起碼有較多地方遊山玩水，所以唔少巴西球迷比賽前一、兩日經已到埗，夜晚喺街上行過唔難發現身穿黃色球衣人四處搵地方醫肚；雖未至於打鑼打鼓大開森巴派對，但間中唱歌助興，以今次喺亞洲舉辦世界盃嚟講，見到有外國球迷搞氣氛已經唔錯，尤其係濟州呢個度假勝地，要有嘈吵聲真係唔容易。