周四晚科技股好似爆咗個小型炸彈，美林調低7間半導體公司中期評級，北電網絡傳出集資14.9億美元，杜指及納指急挫，收市後英特爾因歐洲業務較預期差，調低盈利預測，搞到杜指及納指嘅期指繼續大跌。趙飛雲周一先講過杜指失守9800，將試9600，估唔到咁快就到位，而且跌穿機會相當大。
美股跌勢急，恒指噚日亦受拖累，跌96點，收11284，但一周埋單只係微跌17點，周線圖出現粒十字星，下周有機會反彈。回顧過去一周恒指走勢，低位11204，高位11475，若下周以大陽燭回升，則出現見底嘅早晨之星。
至於稍後有可能出現嘅利好消息，包括美股資金繼續流入港股；盈富基金（2800）發售數額對市場不構成壓力；重售居屋安排利好地產股前景受品題；長實（001）25股優先認購1股長科，吸引大戶掃長實，或者QDII有新進展。不過，短期應該避開科技電訊股，若納指無法喺1550附近形成底部，真係可能會反覆下試去年9月底部1400。
倉內隻鞍鋼（347）冇升跌，收1.24元。內地鋼材價格第2季已開始回升，鋼鐵股應有轉機。鞍鋼技術偏好，可繼續持有。
趙飛雲