英特爾調低第2季銷售額，以致投資者憂慮周五晚美股將大跌，港股噚日率先調整，但跌至11236已經跌唔落，恒指收報11284，跌96點，成交73.23億元。
大戶主要力沽中國移動（941）與滙豐（005），中移動股價跌2.6％，收24.30元，成交達8.24億元，滙豐跌1.3％，收報94.25元，成交7.16億元。不過黑客話，今次大戶只係做定安全措施，唔係睇淡後市，雖然市場普遍認為大市短線要調整，特別係新一季盈富基金（2800）將於7月推出，肯定有大戶趁機壓價買貨，但估計大市嘅跌幅，唔會觸發基金大舉出貨。
海爾中建（1169）近日傳出股東就手機業務發展方向意見分歧，股價噚日一度大跌13％，低見0.248元，收0.26元，跌8.8％，成交1949萬元。Cookie話，基本上中建電訊（138）旨在賣殼賺錢，手機業務點樣發展，當然交由準大股東海爾集團話事，冇分歧可言。不過，此股近期調整幅度較大，先前幫手挾高股價嘅炒家亦急於出貨。事實上，海爾重要向海爾中建注資，增持海爾中建新股，若海爾中建股價太高，對海爾集團都冇着數，因為發行新股嘅定價若較市價有太大折讓，會俾人鬧。
首長系噚日又話會與長實（001）合作，首長科技（521）大升13.7％，收0.58元，成交金額2550萬元。此股近期累積升幅已接近１倍，睇嚟好快會配股集資。
阿虎