標榜41區靚校網嘅九龍城新盤學林軒，發展商不遺餘力硬銷，除咗送獎學金之外，又大派滑鼠墊同蠟筆等宣傳品，擺明吸引望子成龍的父母。
世界盃熱潮令消費轉弱，但有部份商場，卻因而受益。信和嘅大角嘴奧海城商場二期，響美食廣場及露天廣場各設有巨型電視，並即場轉播世界盃賽事。響最高峯期，門前8萬呎廣場，聚集近6000人睇波。信和租務部總經理蔡卉話，個場過去每日有近10萬人次出入，假期更高達13萬人次，自從世界盃開波之後，人次增加一成到一成半。該大電視廣告量亦增加2%。
全城矚目的世界盃熱潮，席捲全球。趁此難得機會，長實同新世界索性今日喺傲雲峰售樓處放部大電視，畀人睇今日中國對巴西賽事，既可增加睇樓人流，整旺個場，員工又可趁機與買家打成一片，氣氛好啲，賣樓都易啲啦。
長實執行董事趙國雄就好有信心話，今日中國隊一定有波入，雖然佢今屆睇好南美球隊，但一於支持祖國隊。
另外已入票（包括內購人士）嘅買家，今明日兩日只要到售樓處，都可以攞到世界盃足球精英集VCD換領券，響下個禮拜，免費換領英國隊巨星碧咸嘅VCD。
蘭西