意大利前鋒恩沙基今日對克羅地亞時，好有可能同佢多年「密友」兼同房韋利正選雙劍合璧，搞到佢不知幾咁興奮。
基仔賽前話自己已經同韋利度好點樣慶祝入波，不過唔宣布住，懶神秘咁。佢哋以前已經俾人影過面貼面，搭晒膊頭食嘢等等嘅親密鏡頭；我求大俠真係擔心兩位大佬今次入球後會興奮過度，做出啲不雅動作，話晒數以億計嘅球迷會睇直播㗎。
曾經喺九四世界盃幫保加利亞攞到第四名嘅史杜捷哥夫，話今屆世界盃係十二年嚟最悶嘅，不過我求大俠就唔係好認同佢嘅睇法喇，事關好似美國對葡萄牙，同埋阿根廷對英格蘭都幾好睇呀。如果今屆賽事有保加利亞份，史杜捷哥夫可能就唔會咁講啩。
葡萄牙首仗爆冷輸咗畀美國二比三後，就猛咁谷啲球員食銀鱈魚同香蕉，希望球員喺吸收多啲營養之後，臨場表現可以得到改善。之但係，我求大俠就覺得咁樣做係治標唔治本，要贏波唔係淨係靠條餐單，應該喺戰術同埋喺位置上作出調動。
喀麥隆前鋒伊圖假假哋都踢過上屆世界盃，同埋參加過悉尼奧運，應該好熟識大賽啲規矩，知道喺賽後可能要抽樣驗尿。但係佢喺前晚踢完對沙地場波之後，唔知係咪緊張得滯，搞咗成兩個半鐘頭先至屙得出尿，真係失禮死人！