高官問責制重有十幾日就要出台,特首董建華噚日就應立法會主席范徐麗泰之邀,同班立法會議員聚餐,喺呢個敏感時刻聯絡吓感情,不過聯絡歸聯絡,阿董一坐低就話林D8同佢講,今日班議員一定追問局長名單同公務員減薪,成圍枱聽到老董咁樣閂後門,自然哈哈大笑,之後想問乜都惟有吞番落肚!
唔講問責制,大家改為風花雪月。老董係超級波友,佢話世界盃期間冇「偷雞」喺辦公室睇波,要等放工返屋企先有得睇。
佢又同議員講吓電影、專業人士北上搵銀問題,但係冇乜具體嘢。
特首個枱講波,另一枱嘅衞生福利局局長楊永強、資訊科技及廣播局局長尤曾家麗同議員大讚私房菜頂瓜瓜,聽到飲食界嘅張宇人起晒火,佢話正想投訴私房菜搶晒食肆生意,點知班官重食得鬼咁開心,咁多食肆執咗,咁又難怪佢咁㷫。
傳真︰2623-9278
電郵︰