前日到東京採訪中田英壽專為世界盃所開嘅中田網頁咖啡店，初時都以為呢間為位處東京中心嘅咖啡店，食物同飲品的價錢會幾貴，但入到去先知，只要有位，「齋坐」或者企喺度睇波都無人趕。
去到咖啡店已經三點幾，照計呢個係上班時間，應該唔會好多人，點知上到二樓一睇，差不多全場爆滿，重有好多「西裝友」同OL喺度睇丹麥對塞內加爾場分組賽。
喺採訪嗰幾個鐘頭，真係見到唔少球迷同市民上咖啡店食嘢，或者買杯飲品睇波，店員都無任歡迎，而幾個女仔服務員重幾靚㖭。
差不多問晒嘢，再走番上咖啡店試試中田最喜歡嘅熱狗同mimoza，但小記覺得呢兩款食物都唔係咁啱口味。
對我來講，食物好唔好食重係其次，最難得係日本或者東京能夠有一處收費唔貴，重有世界盃直播睇嘅好地方；而我最後就用三百日圓買咗杯可樂，睇晒喀麥隆對沙地場波至走人，感覺不知幾正。