唔識中文但又愛冒險炒股仔嘅ABC，噚日又搵小初，佢話有個經紀仔向佢推介一隻創業板股，就係剛剛供完股嘅大陶精密科技（8041），隻股供完股兼轉咗幕後炒家，唔排除稍後會有料到。
小初知道呢隻股來自寶島，數個月前突然失驚無神乾升上55仙，但好快就回落兼且玩供股，斷估有唔少人因此中咗招。
不過，小初睇吓份供股結果通告，只得27份參與供股申請，同埋28份額外認購，計落竟然超額240%，反映隻股歸邊到不得了。
重有大陶上市之時，正係科技股熱潮，唔少外資行都有落叠，而一直沽貨出街亦係呢批外資行，睇怕佢哋冇份參與供股，所以佢哋嘅持股應該已被攤薄。
大陶今次雖然係10供1，每股50仙，但就1送4紅股，每股供股成本即係10仙，今日新股正式買賣，你估有貨會唔會沽呢？所以小初唔敢掂。
慕容小初