「九一一」慘劇發生至今已經大半年，但八方仍然歷歷在目。噚日，又喚起一次回憶，不過今次就悲喜交集，悲嘅當然係死咗無辜嘅人，喜嘅就係《蘋果》因此奪得一個國際獎項。
話說「亞洲出版業協會」昨晚舉行一年一度之頒獎禮，在中環置地廣場美國會筵開十四席，八方見到好多同業先進，有人六點半就到場，諗住探聽吓風聲，但大會保密功夫一流，真係要食完飯九點幾頒獎禮開始，先至知邊個獲獎；講開餐飯，美國會啲燒牛肉又幾好味。
在十五個項目中，《蘋果》贏得三個獎項，包括兩個最佳攝影獎，以及最佳編輯隊伍獎，奪獎作品，就係關於九一一嘅「世紀災難十八版專輯」。《明報》就奪得最佳中文報章榮譽，恭喜恭喜。
做報紙新聞，爭分奪秒；編輯之壓力大到極，又要快又要靚又唔出得錯，所以好講團隊精神。協會定出呢個獎項，非常有意思；八方亦真係要恭喜一大班編輯同事，佢哋嗰幾個禮拜博到盡，係有價值嘅。
傳真︰2623-9278
電郵︰