家陣個個都講緊聽日中國對巴西時，將會淨輸幾多球，有博彩公司已經將中國淨負五球或以上嘅盤口，定為只有不到十倍嘅盤口；雖然都覺得中國難逃一敗嘅機會係好大，但咁樣玩始終唔太穩陣，過癮啲不如博朗拿度捧走神射手獎，回報率都係差唔多咋！
唔係潑中國隊冷水，身為中國人，對哥斯達黎加嗰場都睇到我好肉緊，希望佢哋最少可以入番一球，來個零的突破，奈何實力同經驗始終都未夠班。
巴西首戰土耳其雖只能小勝，未能贏盤只贏波，但朗拿度、李華度等賽前欠狀態嘅主力，已見及時回復水準，相信聽日對中國時，會係佢哋嘅絕佳數胡機會；而中國條防線又無埋有傷嘅范大將軍及孫繼海兩名主力，睇嚟「3R」入面最有態，又係正選前鋒嘅朗拿度，喺呢場波真係可以最少射入中國兩、三球。
而巴西贏埋呢場之後，就幾乎可以宣布出線十六強，即係最少又有多兩場比賽打，十六強佢哋嘅對手，會係H組嘅出線隊伍，實力亦唔算太強；連埋分組賽最後一場對哥斯達黎加，換句話說朗拿度又有望繼續增添進帳喇。
𠵱家射手獎賠率大熱門，係已經射入咗四球嘅德國前鋒高路斯，以及入咗兩球嘅意大利前鋒韋利。德國家陣情況重未可以肯定出到線，高路斯可謂熱而不穩；而意大利重要對同組實力較強嘅克羅地亞及墨西哥，加上佢哋好少出現大捷情況，韋利要攞射手獎可能有一定阻力，所以朗拿度目前重有六、七倍分頭，真係抵玩過波膽㗎！ 文：華度