佘詩曼（阿佘）呢排雖然忙緊拍無綫電視劇《帝女花》，但佢日前喺尖沙嘴嘅美麗華酒店，秘密約咗卓悅化妝品店嘅老闆娘傾偈。
嗰日馮仁昭喺美麗華見到阿佘同佢經理人，重有卓悅嘅老闆娘，坐喺酒店嘅咖啡室密斟咗個幾鐘，佢哋傾得好開心，重有講有笑。
事後馮仁昭八吓佢哋傾乜，原來卓悅嗰邊想同阿佘傾合作嘅事，因為卓悅喺今年八月會大搞纖體美容，之前佢哋已經搵朱茵做化妝品代言人，呢次就想搵阿佘拍纖體廣告。
卓悅方面覺得阿佘好靚同埋形象入屋，都幾適合做代言人，不過𠵱家重係傾緊，未正式落實。如果成事嘅話，阿佘分分鐘同向海嵐嘅皇室纖形打對台。
安雅形象性感，佢近日去咗台灣傾新工作，佢即將接拍台灣一個電視劇《紫色角落》。
安雅到時會同台灣演員鄧肯喺《紫》劇中有一場床上戲，安雅並唔介意，佢話：「我遲啲會喺王晶套新戲同MaggieQ有啲激情同暴力嘅戲份，而且電視嘅尺度有限，我正好當係熱身。」
新加坡女歌手孫燕姿同莫文蔚，後日將會喺台灣來個正面對撼，佢哋會同一日舉行網上演唱會。據知𠵱家已經有十萬個網民，會上網欣賞佢哋嘅演唱會，呢啲網上睇演唱會，對於歌迷講，絕對係充滿新鮮
馮仁昭噚日同個老友傾開偈，佢話早排喺上海金茂君悅酒店度撞見劉嘉玲，當時啱啱出𨋢嘅嘉玲，隻手重蹺住個幾靚仔嘅上海男模特兒，不過，佢一出𨋢之後見到四周圍啲人眼望望，就即刻鬆開隻手。老友話嘉玲好多時去上海，都會同呢位男模見面，唔通呢個就係嘉玲嘅上海情人？
香港電影市道唔好，搞到好多港星都要出外搵食，就好似梁家輝咁，𠵱家香港冇乜導演搵佢開戲，但佢又要養老婆同兩個女，於是咪惟有去美國拍啲C級製作嘅電影，即係製作成本較低嗰啲，聽講佢𠵱家手頭上都接咗幾部呢啲戲。如果佢唔係肯咁樣屈就吓，真係分分鐘坐幾年冷板櫈都唔定。
稻草人製作有限公司近日頻頻推出新人，先有樂壇新人江彬，最近又有陳曉淇。佢曾經喺台灣出過一張國語EP。稻草人製作有限公司重準備為陳曉淇開拓香港市場，陳曉淇日前話：「我準備喺香港推出廣東EP，形象會以青春為主，我𠵱家正努力學跳舞同唱歌，希望香港嘅觀眾會鍾意我。」