地產股有好消息入市，加埋周三晚美股全面反彈，但恒指只係早市彈一彈，就回頭向下，最後倒跌21點，連11400關口亦得而復失，一副示人以弱嘅姿勢。
最近世界盃同跑馬頻頻爆大冷，法國對塞內加爾及美國對葡萄牙兩場波，趙飛雲睇到眼都突。最近兩次賽馬，上個禮拜六沙田十場賽事，大熱門9死1生，到第10場先至開場熱門，而禮拜三更加7場大熱門全倒灶，真係傷亡慘重，搞到趙飛雲要提早出山，短炒番兩轉幫補。
噚日傳出中國證監會關注近排內地股市跌勢，內地A、B股反彈3-4%，同時亦帶動本地紅籌國企造好。事實上個市咁多人要搵食，唔可以靜得太耐，二三線狂抽水，自己玩死自己，盈富基金（2800）未知新季度會賣幾多，好多人都唔敢亂掂藍籌股，資金於是暫時流向紅籌國企股。
趙飛雲睇見鞍鋼（347）個勢唔錯，加上現價往績PE10倍，預測8倍，價格合理，前日升破短期下降軌後，連升2日，如果升破5月頂部1.26元及4月頂部1.30元，有機上試1.35-1.45元，暫時喺1.24元買10萬股，如升破1.30元再加注，若先跌穿50日線1.18元則止蝕。
趙飛雲