港府宣布重售居屋政策後，雖然地產商與證券分析員都異口同聲叫好，不過地產股噚日卻出現獲利回吐，大地產股幾乎全線報跌，大戶未有因新政策而大舉入市，市場對地產股在經濟環境差嘅情況下，能否跑贏大市相當懷疑。與此同時敦煌酒樓全線結業，大家都好清楚本港內部需求極之疲弱，個個今日唔知聽日事，重邊有人有心機買樓作長遠投資呢？
敦煌結業最終得益者係大快活（052）及大家樂（341）呢類快餐店，其中大家樂管理層較受基金經理歡迎，股份較受追捧，噚日又升4.6%，收報6.80元。大家樂能在逆市中長升長有，都算難得，不過升至此水平，已經有歐洲基金對其價值有所懷疑，所以現價追入，真係要小心。
金匡企業（286）最近見過證券界，希望股份再度引起投資者注意，噚日股價一度大升18%，最高見過0.065元，收0.061元，但成交只得242萬元。有分析界朋友話，今次公司見證券界，冇咩特別好消息，亦冇具體業務發展大計可供參考，都唔知點向人推介，真令人難做。
ｅ莉莎話，早前金匡委任咗個配售代理，盡力以每股0.061元配售2.39億股，至今都未完成，因此股價高於呢個水平唔好手多多。
陽光文化（307）噚日停牌，據聞話會入股北大青鳥（8095）母公司旗下一項影音業務，因而要發行可換股債券。不過黑客話，單Deal應該冇咩刺激可言。
阿 虎